﻿Zabur 18
LONGOI DI DAUD DI KINAMANANGAN DAU

(Pemimpin)
! Bahagi di maangagazad do kuaya. Zabur di Daud it uripon di TUHAN. Linongoi sid TUHAN i hiza di minanapul di Daud i TUHAN antad sid Raja Saul om i sokoviai i sangod dau.

(Jemaat)
O TUHAN, banalko manamod oku dikau! Ikau no o mangapad dohon.

(Pemimpin)
I TUHAN o mongolikup dohon, Yosido dino yadko it u'ugopon do sojal dit apapag bahagi ku. I Kinoringan ku o moongolikup dohon, apasi oku do kama'a Dau. Mongolikup Yosido dohon yadko kolig, mangapad om manaud Yosido dohon supaya apasi oku.

(Jemaat)
Mongodim oku di TUHAN it apatut dot indozohon, om manapul Yosido dohon antad sid sangod ku.

(Pemimpin)
Notutukan oku no dot kopunavatan do kapatazan, i lizud do kobinasa'an lumopot sid dohon.

(Jemaat)
Notutukan oku do kopunavatan do kapatazan, om i lobong pata'an sid dohon do pirangkap.

(Pemimpin)
Sid kosusa'an oku, mongodim oku di TUHAN, mongodim oku di Kinoringan ku tu mokitulung Dau. Mongining Yosido di dolou ku, initung Dau i poongodim ku.

(Jemaat)
Iri ogi giumuzu om giumugul no i putana'on, i pu'un do burul noguzu om nogugul, gima i hungot di Kinoringan.

(Pemimpin)
Mongolitatabai i lisun antad sid odung Dau, om sumimbulot no lumabus o sinikit dot apui om popou antad sid kabang Dau.

(Jemaat)
Lapakon Dau it avan iri ogi mindahu Yosido dot kotuvangan o sahau di lapap do hakod Dau.

(Pemimpin)
Alangkas Yosido tumulud do sumako sid malaikat; tumulud Yosido sid timpak dot alad do barat.

(Jemaat)
Minimbuvut Yosido do kotuvangan, om i mituvong dot akapal mongolimput Dau.

(Pemimpin)
I darun vatu om apui, rumikot antad sid gonit i sid tinoguvangon Dau, lumopuson di mituvong it akapal dino.

(Jemaat)
Iri ogi pinoungkorud di TUHAN it avan om i Banalko Asavat pinening di dolou Dau.

(Pemimpin)
Vinakas i pana Dau om inunang i sangod Dau, Pinoungkilad Dau i gonit sampai nakatangkus it ongosangod.

(Jemaat)
I nanad do rahat nembulazan, om i kinoogomo do putana'on nokembulai, di minoniag Ko di Sangod Nu o TUHAN, gima i hungot Nu di nakalabai sid dioti.

(Pemimpin)
Nitivol di TUHAN i longon Dau antad sid savat, kinovidan oku tu minongodong dohon palabus antad sid vaig dot aralom.

(Jemaat)
Sinopulan oku Dau antad sid sangod ku dot akansang, om antad sid ulun di sumana dohon, tu yoti banalko akansangan oku.

(Pemimpin)
Rinumpak oku dioti di hiza dot osusa oku, topot i TUHAN o minongolikup dohon.

(Jemaat)
Nilabus oku Dau antad sid kopunavatan, sinopulan oku Dau sabap ozi Yosido dohon.

(Pemimpin)
Sinu'ulan oku di TUHAN tu abanal i gagama'on ku, binarakatan oku Dau tu aso sala ku.

(Jemaat)
Yoku diti siumuhut di pinonuhuan di TUHAN, amu oku minogidu antad sid Kinoringan ku.

(Pemimpin)
Siumuhut oku di sokoviai i hukum Dau, om amu ku pinosimozo i pinonuhuan Dau.

(Jemaat)
Ela'an-i Dau do yoku diti aso kara'atan sid tinoguvangon Dau, om minsodu oku nopo antad sid kasala'an.

(Pemimpin)
Manjadi sinu'ulan oku Dau tu mangagama oku nopo dot abanal, sabap ela'an Dau do yoku diti aso sala.

(Jemaat)
O TUHAN, atatap Ko sid ulun dit atatap sid Dikau, om banalko avantang Ko sid ulun dit avantang sid dikau.

(Pemimpin)
Pinentalang Ko dot osusi i kondiri Nu sid ulun dot osusi, topot kumisangod Ko dit ulun tara'at.

(Jemaat)
Sinopulan Nu it ulun dit osibak o ginavo, topot ninsibak Nu it ulun dit asavat o ginavo.

(Pemimpin)
Tinahakan oku Dikau do binahang; TUHAN Kinoringan ku o minanganavau di kotuvongo ku.

(Jemaat)
Minanahak Ko dohon do kakansango kumiumbal di sangod ku,om kuasa do mongolopuson di kuta dioti.

(Pemimpin)
Rinangkap nobo di gama di Kinoringan diti! I boros Dau apatut dot imozo'on. Yosido dino kolig di sokoviai it ulun di mokilikup Dau.

(Jemaat)
Iso no i TUHAN dino o Kinoringan, baiko Yosido o mangapad ditokou.

(Pemimpin)
Yosido no o Kinoringan i pinakansang dohon om minananus di kopunavatan sid vaza'an ku.

(Jemaat)
Pakansang Yosido di hakod ku do yadko hakod do tambang, om minanaud dohon sid ongoburul.

(Pemimpin)
Inubas oku Dau mirumpak, supaya kopongolokud oku di pana i banalko ologod.

(Jemaat)
O TUHAN, Ikau no o monglikup om manapul dohon, nokoronuw oku tu i kotulungan Nu, om i kuasa Nu o minanaud di kosopulan ku.

(Pemimpin)
Minanaud Ko dohon supaya amu oku arakop, om amu kopiti'im oku dot aratu.

(Jemaat)
Gusaon om tabpa'an ku i sangod ku, amu oku mintoron sampai otori ku yoti.

(Pemimpin)
Bobogon ku yoti sampai amu kotungag yoti, nahaba yoti tu notori sid tinoguvangon ku.

(Jemaat)
Tinahakan oku Dikau do kakansangan mirumpak, om kamanangan ku sid sangod ku.

(Pemimpin)
Ikau no o kasabap do tumangkus i sangod ku antad sid dohon, binasaon ku it ulun dit asana dohon.

(Jemaat)
Mongogizak yoti mokitulung, topot isai nopo nga aso manapul dioti, mongodim yoti di TUHAN, topot amu tumimpa i Tuhan.

(Pemimpin)
Huzason ku yoti sampai osiliu dot avu i tilibon do barat, ladtak-ladtakan ku yoti yadko i rapak sid ralan.

(Jemaat)
Ikau no o manapul dohon antad sid bansa di siuma'ap, om pinajadi dohon do monguasa dit ongobansa, i bansa dit amu ku otutunan nga osiliu-i do razat ku.

(Pemimpin)
I bansa tanid sumingkudou rumonok sid tinoguvangon ku, om sumuhut ong kodung korongou no di hukum ku.

(Jemaat)
Midu i kosioho dioti, sampai mogkikip no lumabus antad sid kuta dau.

(Pemimpin)
Mizau i TUHAN! Indozoho no i maangapad dohon! Pahabaron no i kasavato di maanapul dohon!

(Jemaat)
Pinamanang oku Dau antad sid sangod ku, rinakop Dau it ongobansa om yoku no momorinta dioti,

(Pemimpin)
om minanapul dohon antad sid sangod ku.TUHAN, Ikau no o pinamanang dohon antad sid sangod ku, om linikupan oku Dikau antad sid ulun dot orongit.

(Jemaat)
Manjadi mongindazou oku Dikau sid tanga dit ongobansa,  mindolongoi oku do longoi mongindazou Dikau.

(Semua)
I Kinoringan manahak dot agazo o kamanangan di raja i nopili Dau, tantu manamod Yosido dit ulun i pinangkat Dau, ino no i Daud om i mongkupu dau sampai penlaid.

